Han wo Naari hai Jise Naman karta Sansar hai

Wo shawarup hai prem shakti ka,.
Har Nari devi ka avtaar hai..
Aadar, Samman ki murat hai wo..
Wo har jivan ka aadhar hai..
Hai wo kabi Saraswati, hai wo kabi durga..
Mamta uska gehna hai, Saralta uska shringar hai..
Hai jisme Surya sa tej or chandra si nirmalta,.
Han wo Naari hai, Jise naman karta sansar hai..

Janmi wo beti ban kar, laxmi bani kisi ke chhav pe..
Maa ka darza pane ko wo, rakhti praan apne daav pe..
aanch na aane deti samman pe, garav badati har naari ka..
Har path par badti wo, Kante sehti apne paanv pe..
Ban kar beti, ban kar kisi ki ardhangni, pura karti apna dayitav,
Prem sparsh uska malham banta har gaav pe..
Uski chuppi hi nhi, uska krodh b uska samman hai..
Lade wo jab adhikar ke liye, ruke nahi kisi pathraav pe..
Komalta uski, saumyta uski, uski kadwahat me bhi pyaar hai..
Han wo Naari hai, Jise naman karta sansar hai..

Nirbal, kamjor maan kar usko, kyun kare uska apmaan?
Jhuthe, khokle rivajo me baandh kar usko, kyn le uske praan?
jab jhuko na tum khud, to kyun jhuke wo ghutne tek ke..
Kore abhimaan ke lalach me, kyun tode uska shvabhimaan?
Badalte sansar me, usne racha har baar itihaas..
Har Roop me sanwara kr khud ko, uccha kiya apna naam..
Pag-Pag me paa kar manjil, badaya hausla har naari ka..
jeet kar pura sansar, chhota kar diya har kaam..
rok kar burai, bada kar khud ko, jo na banti lachar hai..
Han wo Naari hai, Jise naman karta sansar hai..

Fir kyun uski yaadon ne dil ko rula diya

Sath chalna na tha use, har mod par rahon ko dosh diya..
Pyaar ko pairon se raund kar, Gurur me kadam bada liya..
Laparwah mohabbat thi wo, jisne aankhe band ki ise tuta dekh kar,.
Lajmi tha chuban in tukadon ka, fir kyun uski yaadon ne dil ko rula diya..

Saya ban kar chale har pal, uske saath..
Har bure-acche daur me bane hamraz..
Na samjha usne mujhe apne kabil..
Meri wafadari par, kiya aetraz..

Apni ruh, apni dhadhkan me kiya use shamil,.
Maan kar khuda, apna sir jhuka liya,.
Fir kyun uski yaadon ne, dil ko rula diya..

Hans kar mere jajbaton par,.
Bekhauf hans raha tha gurur uska,.
Jalil ki jisne meri wafa, meri inayaat..
Mere ashko ke dariyan me, jiya gurur uska..
or dubi meri sacchi mohabbat..
Mauka deta gaya ye dil usko..
Tutati ummeedon ne bhi, de di dil ko laanat..
Kabool tha beraham tohfa, uske gurur ka..
Par koste zameer, jalti ruh ne na di dil ko izzajat..
Mere sabar ne bhi, apna lahoo baha diya..
Fir kyun uski yaadon ne, dil ko rula diya..

Mudana nahi ab, uski chahat ke liye..
Haqk hai ye janu mai, wo dil ke kitne kareeb hai..
Samjha kar thak gaye jubaan, halaton ko..
Kyun ab bhi chhaya, uska suroor hai..
Aakhir chhod diya use, us raah par,.
Jahan se mere dil ki manzil door hai..
Dekhna ab banki bas ye hai..
Uski zindagi me Main Hun Ya Uska Gurur Hai?
Ab uske lautane ki ummeed me, aanhon ko bichha liya..
Fir kyun uski yaadon ne, dil ko rula diya..

Wo khushiyan bantne wali muskan hai

Kaha tha us khaas ne, jb hui thi baton ki daud-chaal,.
" Likh kar kuch mere bare me, Jara karna mera khyal"
Hami bhari thi maine, kaha-" Han!! Jarur."
Soch raha hai dil, Kaise dikhaye uski khubiyon ka noor!!..
Chalo bahane se hi sahi, ek mauka mila hai mujhe..
Apne alfazo me aakhir, kaise karun bayan use..

Naam kafi hai uska, jo bole uski khubiyan,.
Khuddari me ji kar, Chhuna chahe wo aasman,.
Ek junoon hai usme, jo thane kuch hat ke kar dikhane ki..
Wo aisi aandhi hai, jo dhundh le khud apna rasta..
Badi-badi aankhe uski, hai ghungrale baal..
Har aada me shararate, har bat pr swal..
Thodi pagali si hai, thoda Bachpana hai uska..
Sacche dosto me uski, dosti bemisal..

Kitabon me dube rahana, uski pehchan hai..
Har pal ko jeena hi, uski shaan hai..
Doston sang masti ka wo pitara hai..
Muskurahat bikherne wali, Khushiyo ki wo dukan hai..
Shatir bahut hai wo apne aansu chhipane me..
Shatir bahut hai wo khud ko samjhane me..
Gum se bhagti nahi, ladti hai wo, use harati bhi hai..
Han Shatir bahut hai wo, har dard ka sir jhukane me..

Wo kayal hai saaj ki, wo kayal hai sur ki, aawaj ki..
Jajban hai usme kuch kar dikhane ka,.
Han wo kayal hai har paakh aagaj ki..
Kamzor nahi uski shakhsiyat, Rutba uska mukam hai..
Jhukti nhi wo dikhawe par, uska dil hi uski zubaan hai..
Ravaiyaa uska najuk bhi hai, sakhat bhi,.
Wo khushiyan bantne wali, muskan hai.. 

Maa tu meri takleef se anjaan nahi

Shikayat wahi, meri chuppi wahi,.
Jab maa meri puchhe-
" Ye sirhane me tere daag kaisa?
Na nam ghar ki diwaar hai,.
Tujhe sardi hai, na bukhar hai..
To bol sirhane me tere daag kaisa? "
Mere Jwab me itni takat nhi,.
ki sabdo ke jaal jakad le us swaal ko,.
Nazre chura kar, khud ko bacha kar..
Kah deti hun-  " mujhe maloom nahi."

Juthi need ke bahane jab simat kar soti hun..
Maa puchhe mujhse- " tujhe takleef kya hai? "
Chadar ko sir tk sarka kar, chehre ko hatho se chhipa kar..
Kahti hun mai-
" Dard hai thoda theek ho jayega..
Need aate hi dur ho jayega."
Maa Kahe tab- " Kya mai madat karun teri?"
Na chah kar bhi kahti hun mai-
" Nahi Maa!! Jarurat nahi."

Mere dard me na jane, kitna dard wo sahti hai..
Chehra mera padh kar bhi chup hi rahti hai..
Gum-sum, berang si meri jindgi me,.
Apni har chhoti-2 khushiya, mujhe saupa karti hai..
Kaise kahun mai tujhe maa ki-
 " WO MERI PARWAH NAHI KARTA."
Kaise kahun mai tujhse maa ki-
" Wo daag mere aansuon ki parchhai hai..
Kisi ko chahti hun mai, khud se badkar..
Yahi mere aansuon ki sachchai hai.."

Akash mera gum-naam nahi.
Sahi-galat ki mujhme pahchan nahi.
Muskil hua hai, fir se muskura ke jeena,.
Tut-2 kar judna mera, ab aasan nhi..
Tujhe pata hai meri har bat kanhi..
Mite se mere sapne, khoye se armaan kai..
Han mai janti hun Maa..
Tu meri takleef se anjan nahi..

Han Tujhko Pana Mera Naseeb Hai

Tanha thi Zindagi tere aane se pahle..
Tu aayi to le aayi, Mausam bahaar ke..
Dhundhata tha sathi, har mod pe..
Tu aayi  to bane, naye raste pyaar ke..
Chal kar unme, main badha teri oor..
Khile phool, lambi intazaar ke..
Thama hath tune to, mili mujhe roshani..
Tab li maine sanse, Pahli karaar ke..
Dil ke rishten bhi bade ajeeb hai..
Han tujhko pana, mera naseeb hai..


Mera Mizaz gusse se bhara,.
Par teri Adaaon me sadagi..
Meri sharafat me bhi manmaniyan..
Teri nafrat me bhi, khuda ki bandagi..
Meri khamiyo par tera parda..
Teri khubiyon se chhipi meri aawargi..
Mai kasar na chhodun, tujhe rulane me..
Fir bhi!! mujhse hi teri Zindagi..
Tera dil ameer hai, mera gurur gareeb hai..
Han tujhko pana, mera naseeb hai..

Mujhe pasand nahi, jahir karna apni baaten..
Ek tu hai, jo dil ka kitab kholti mere samne..
Khamosi meri sune tu gaur se..
Mai na sun kar tujhe, lagta hun haarne..
Tu Mohabbat me choor ho jaye, mere khatir..
Mai hosh me bhi, dubun gurur ke jaam me..
Mai bachaun tujhe, meri manhusiyat se..
Tu bekhauf jode apna naam, mere naam se..
Meri badsuluki ko jhelna bhi, teri tahzeeb hai..
Han tujhko pana, mera naseeb hai..

Tu maane mujhe, apne dil ka ek hissa,.
Mai samjhata raha tujhe, ek mehmaan..
Mai karta rha, har pal tujhse shikayaten..
Tune basa li mujhme apni jaan..
Naa jana mujhe chhod kar, tang aa kar mujhse..
Ab mera dil ho chuka hai, tujh par kurbaan..
Na kam karna apni mohabbat mujhse,.
Bas kar do fir se, ek yahi ehsaan..
Sakhsiyat hum alag hai, fir bhi dil kareeb hai..
Han tujhko pana, mera naseeb hai..

Mai Akela, Tu Akeli

Mai puchun tujhse- Teri muskurahat kahan gum ho gyi?
Tu bas kahe itna- Nakamiyab koshisho me kho gyi..
Mai akela, tu akeli!! Parwah duniya ki nahi..
Tanhai ke mehkhane me, koi humara khuda nahi..

Tu bhagti khud ke Saye se, mai kah na paun aap-biti..
Mere ashak chhipe mere dil pe, tu hotho me apni siskiyan siti..
Ek sunsan khandar hai, jahan lau nhi roshni ki..
Yahan bikhare lash tute dilo ke, to kuch me tammana nhi jindagi ki..
Haal tera-mera bhi kuch aisa hi hai, tut chuka dil ka bandhan..
Mujhe sath kisi ka pasand nhi, tujhe pasand akelapan..
Mai bhatkun un raston pr, jahan dhundhle hai nishaan..
Tu thahari rahi un raston pr, jahan mile na mukam..
Raftar Jindagi ka ruka nhi, daudati rahi ghadi ki suiyan,.
Jhuthe duniya ki bheed me, palti rhi khushfehmiyan..
Samne hai sachai dard ke sang, kahne ko kuch bhi bacha nhi..
Na hum galat hai, na ye duniya sahi..
Fir bhi na jane kyun, bikharati Jindagi ki kali..
Banki yahi- Mai Akela, Tu akeli..

Kash Hoti Har Dard Ki Jubaan

Kash! hoti har dard ki jubaan,.
To aasan hota karna, Takleef byaan..
Jab lagti chot dil par, sile lab karte aaram..
Kash! hoti har dard ki jubaan..


Na bechain hote jajbaat, Na ro-ro kar katti raat..
Ehsason ko na hoti ghutan, siskiyo me aawaze na hoti gum..
Na khota subah ka suraj, Na thahrati sunheri shaam..
Kash! hoti har dard ki jubaan..
Dil ke parinde dete, har waar ka jwaab..
Aasuen aankho se na behaten be-hisaab..
Lekha-jhokha har takleef ka hota mehfuz..
Bolte dard ki bhi, ek hoti kitab..
Dil ke karobar me, na hoti dard ki dukan..
Kash! hoti har dard ki jubaan..

Darta insan bhi kisi ko dard dene me..
Muskurahat raaj karti, dil ke kone me..
Na hota, bikhare rishton ka bojh..
To sukun milta, dil ko kaid hone me..
Paas hota apne pyaar ka har mukaam..
Kash! hoti har dard ki jubaan..

Bheegte na nazren, aansuon k chhiton se..
Chahat ko dhundhati nigahen, chhipti na farebo se..
Jhurriyan paresani ki, na basati apna dera..
Chehre ki chamak, na mitti kore khaufo se..
Rab ko na kosta, koi insaan..
Kash! hoti har dard ki jubaan..

Bin Tere, Meri Zindagi Adhuri

Masumiyat ki murat hai tu, kaid dil ke kone me,.
Dekh kar jise, chahe mera dil baar-baar..
Nigahon me bhari hai teri, zidd ki lahar,.
Karun mai jinhe pyaar, baar-baar..
Shikayate meri, dam todti tere ashko par,.
Tere aansuon ka dariya, dubaye mujhe baar-baar..

Na jane mom sa dil mujhme, hai ya nahi..
Par teri chahat me pighal jaun, mai baar-baar..
Tujhse mulakat kam hoti hai meri,.
Fir bhi ladti hai tu, mujhse baar-baar..
Tera zidd, teri narajgi manjur mujhe,.
Agar tu chahe har janam, mujhe baar-baar..
Bachpana nahi mujhme tujh sa, na chahun mai tujhse duri..
Tu ban mera gurur, bin tere meri zindagi adhuri..

Har paigam teri mohabbat ka, Mohtaz meri izzazat ka,.
Kyun tu jine lagi hai ab, mujhme kho kar, Bana tera junun hissa, meri inayat ka..
Thakte nahi tere honth, baar-baar mohabbat ka naam lekar..
Mai to bas ek fika sa rang hun, teri ibaadat ka..
Kaid nahi mai teri tarah, har pal is mohbbat mein..
Par kar Yakeen!! Mai deewana hun teri chahat ka..
Is chahat me, Tu hi taakat meri - tu hi meri Majburi,.
Na rehna mujhse khafa tu, bin tere meri zindagi adhuri..

Jhagade tere-mere, Ye bhi bade acchhe hain!! jo fansalen badhaten..
Choor ho kar humari mohbbat me, hume kareeb le aate..
Aamna-samna humara, ek sharam ki chadar mein..
Parde me rahkar, har pal dil me samaate..
Mai harna na chahun zindagi me, tu jiti hai mohbbat k waste..
Tu ban ja thodi mujh jaisi, Mai thodi apna lun teri aadate..
Sach hai ye jhuth nahi, is rishte me jhukaw tera - mera hai jaruri..
Aa sath de tu mera, bin tere meri zindagi adhuri..

Mera Pahala Pyaar

Kitni khush thi mai use pakar, Yaad bhi na tha khud ka vazood..
Meri Pahali Mohabbat, MERA PAHALA PYAAR, ya kahun ishq ka Pahala teer..


Lambi sardiyo ki wo raat thi,.
dari-dari, sahmi-sahmi, mai fir bhi uske sath thi..
Tej dhadkano ki raftaar thami na thi,.
Mere dil me bas uski hi baat thi..
Badi der tk thahre rahe hum sab sathi, kisi mahfil me..
Bahana bana uska, mujhe ghar tk chhodna,.
kadmon ka dheere-dheere badhana uska,.
Or har baat ko Ishq ki taraf modna..
Samajh kar bhi na samajh banna mera,.
Uski ishq ki baaton ko beech me hi todna..
Thaki-thaki uski sari koshishe, ummeed se nigah uthati..
dabi-dabi uski baaten, dil ka raaz batati..
Mai khush thi, use is tarah tadapta dekh kar,.
Kyunki har baat uski, chahat ke hi raag gaati..
Kaha maine gusse se-
" Kya rakha hain in fizul baaton me,
Kyun kare waqt barbad duniya, is Mohabbat me!!! "
Badi hairani se puccha usne-
" Kyun kahti ho tum aise?, Kya bigada tumhara is chaahat ne?
Duniya chale isi ke bal par, kya yakeen nahi tumhe Mohabbat me? "
Kaha maine-
" Hadden todna mujhe pasand nahi, dhokha hai dil ka haar"
Thahar kar wo bola-
" Meeta dun mai ye galat fahmi, gar kar lo tum mujhse pyaar"
Main dang thi uske is jawab pr, wo bhi uljha rah gaya..
Na socha tha jo maine, na socha tha jo usne..
Kuch is tarah, wo dil ki baat kah gya..
Ruka wo achanak, rok kar kadam apne,.
Baitha wo ghutno pr jhuka kar sir, mere samne..
dar-dar ke wo bola-
" Mai na janu, tere dil ki koi baat,.
Par jab se tujhe jana, tujhe mana apni kaynat..
Ikraar-e-mohbbat to ek bahana hai, tujhe paane ka,.
Meri chahat hain, paun mai umar-bhar tera sath..
Kaho tumhara jwab kya hai?? Ya mai karun khuda se fariyad??
Akela kar dogi mujhe ya thamogi mera hath?? "
Dhadkane daud rahi thi har pal, Ualjhano me khoya tha dil..
Sochane lagi- kaise mai dun jwab, swal hai bada muskil..
Juta kar himmat mai boli-
" Kash!! Na ho ye mera sapna..
Mai hui tumhari, tum bana lo mujhe apna."

Kitni khush thi mai use pakar, Yaad bhi na tha khud ka vazood..
Meri Pahali Mohabbat, MERA PAHALA PYAAR, ya kahun ishq ka Pahala teer..

Mai Fir Aaungi

Chaadar baraf ki bichhayi thi mausam ne,.
Kambal nam OOns ki  odhi thi raahon ne,.
Fir bhi chubhati nam hawayen, chhu na saki mujhe,.
Meri thandi aanhon ko jhakda tha, uski bahon ne..

Han aayi thi mai, khud me simat kar, thand me lipat kar,.
Chupke-chupke Usse milne, sari duniya se chhip kar,.
Bhuli nahi mai, mere kadamon ki dabi aahat,.
Har kadam badha rahi thi mai, Katra-katra kar..
Uljhane badhai thi meri, in sard hawaon ne,.
Dikha uska saya mujhe, dhundh ki chhaw me,.
Lipat kar usse kaha maine, Kyun khade ho in sunsan rahon me?
Wo bola- Gaur se dekho!!! Kitna intazaar hai meri nigahon me...
Dam ghutane laga tha mera, hawa ki kaid me,.
Uski bahon me mili, meri saanso ko aajadi,.
Ye jhoke thand ke, chhune lage jab mujhe,.
Uski chhuwan ne di mujhe, narm garmi ki waadi,.
Najdikiyan hontho ki, badhaati rahi dil ki aag,.
Aakhir!! Ye band honth mere, ho gaye raaji..
Din dhal chuka tha, baadalon ne ghera fir se aasmaan..
Ab wapas laut rahi thi, Ujaalo me jiti waadiyan,.
Mai bhi uthi, ghar wapas jane ko!! to Usne kaha-
Tera didar baanki hai, Tu kal fir aana yahan..
Thaam kar hath uska mai boli-
Tera pyaar mai kaise bhul paungi..
Dur rah kar tujhse, mai bejaan si ho jaungi..
Ye mausam chahe badalte rahen..
Wada hai mera, Mai Fir Aaungi..
Mai Fir Aaungi..

Bachana Jara!! Ye Hai Khushk Sardi Ki Shuruwat

HAPPY WINTER SEASON!!!!
Baraf ki safed chadar, kohre me dhaki suraj ki shan..
Pedo se juda patte, khoye hain jinke nishan..
Aasmaan ka ravaiyya kora hai, panchhiyo ki bhi hai band zubaan..
Mausam bhi hai kuch rutha sa, Yahan pighalti har sham..
Har saal is sard mausam ki, hai ek yhi baat..
Bachana jara!! Ye hai khushk sardi ki shuruwat.. 


Pattiya girti hai pedo se, nachayen jab thandi hawayen sab ko,.
Jhuki tehniya jataye aise, jaise sajda ho rab ko..
Pyasi jheel aise samete baraf ke tukdo ko,.
Jaise tarsi ho wo, sadiyo se inki jhalak ko..
Chauraah ki mand battiyo me, soti hai jab raat..
Bachana jara!! Ye hai khushk sardi ki shuruwat.. 

June ki tez-tapti dhup se zudai, August ki suhawane mausam se vidai..
Ab subah hoti hai mand suraj sang, jab thand leti hai angdai..
Chay ka pyala bane nam OOns se, bhigayen hoth ye thand hawayen..
Hitar or aang fike hai is mausam ke samne, har pal thand ki maar sataye..
Aakhir chhute kaise sardiyo ka sath,..
Bachana jara!! Ye hai khushk sardi ki shuruwat.. 

Meri Pahli Pahal

Jajbato pr thehraw lana muskil tha..
Tammannao ko maar pana muskil tha..
Alfazo ka baadal banta gaya..
Kalam ki pehali barsat ko, rok pana muskil tha..
Bana tha tb ehsaso ka Mehal..
Han yhi thi meri Pehali Pahal..


Mano Hr sabd jeena chahte the..
Pankh laga kar armaan,udana chahte the..
Likhawat bhi khubsurati se sajate inhe..
Har Jajbat apni Zindagi bunna chahte the..
Inhe dil me kaid krna tha, behad muskil.. 
panno ki jubaa bani thi meri Pehali Pahal..

Ye Sabd aksar ladkhada jate,..
Lakh kosiso pr bhi bikhar jate..
Waqt laga inhe, sambhalne me..
Acche-Bure, har ehsas me ye badal jate..
Kalam sametti rhi samandar, har pal..
Par behti dhaar thi, meri Pehali Pahal..

Mausam Zindagi k badalte rhe..
Khushi or Gum k suraj dhalte rhe..
Chehre kai dikhe, Har mod par..
Kalam sang, ehsas chalte rhe..
Fir bhi !! Har pahar ne failaya, Khushnuma aanchal..
Har Zarre ko Jeeti gayi, meri Pehali Pahal..

Dayra behad kam hai Alfazo ka, par Jajbato ka nahi..
Chehra, Rup, Har khubsurati hai inki, Kalam k dam par..
Ehsas Behti Nadi hai, Thehra Talab nahi..
Bahaw badta rahega inka, Har kadam par..
Har lamhe me bsa hai, ek naya kal..
Har Pahal hi hai meri, Pehali Pahal..